Хоёр ба гурав, түүнээс  олон хоногоор баас саатан, хатуу төлөвтэй, бага хэмжээгээр, дүлүүлж , дутуу гарах шинжийг баас хатах гэнэ.

БААС ХАТАЛТЫН ШИНЖҮҮД:

•           Баас хатах, зовуурь шаналгаатай дүлүүлэх

•           Баасны дараа санаа амрахгүй , гэдэс суллагдаагүй мэт санагдах

•           Хатуу бага хэмжээтэй, хоргол шиг баах

•           Цөөн баах

ЭМЧИЛГЭЭ:

Эмийн болон эмийн бус эмчилгээ хийнэ. Эмийн эмчилгээг эмчийн зөвлөгөөний дагуу ууж хэрэглэнэ.

Эмчилгээнд хоолны дэглэм чухал. Баас хаталтын үед эмчилгээний хоол №3-ыг өгнө. Өдөрт 4-6 удаа хооллоно. Хоногийн хоол 2900-3000 ккал илчлэгтэй байх ба түүнд агуулагдах уургийн хэмжээ 90-100 грамм, нүүрс ус 400-450 грамм, өөх тос 90-100 грамм, давс 8-10 грамм, уух шингэн 1,5-2 литр байхаар зохицуулна. Хоолыг буцалгах, жигнэх аргаар бэлтгэнэ. Эмчилгээний журмаар өглөө бүр буцалсан бүлээн ус, рашаан уух, өдөр бүр жимс, ногоо идэх ба хоногт хэрэглэх хүнсний ислэгийн хэмжээ 25-30 гр байх ёстой.

ХЭРЭГЛЭЖ БОЛОХ ХҮНСНИЙ БҮТЭЭГДЭХҮҮН:

•           Гурилан бүтээгдэхүүн: хүнсний эслэгээр баялаг бүдүүн ширхэгтэй улаан буудайн гурилаар хийсэн бүтээгдэхүүн , хивэгтэй талх, гурилан боов, жигнэмэг , хар гурил , гурвалжин болон хөц будаа, хөх тариа

•           Шөл: өөх тос багатай янз бүрийн махны тунгалаг шөл , загасны шөл, улаан манжингийн шөл , хөц болон амуу будааны шөл , цэцэгт байцааны шөл

•           Мах: үхэр, тахиа, загасны махыг чанаж,  жигнэсэн байдлаар

•           Өөх тос: ургамлын,, оливын, цөцгийн тос

•           Сүүн бүтээгдэхүүн: шар сүү, тараг

•           Ногоо: янз бүрийн хүнсний ногоо, ялангуяа яншуй,гоньд зэрэг навчит ногоо, цэцэгт байцаа, хурган гуа, улаан манжин, шар лууван, улаан лооль, өргөст хэмх, вандуй, байцаа

•           Жимс: хар чавга, чангаанз, инжир, чихэрлэг алим, жүрж, усан үзэм