“Ахмад настны цогц тусламж, үйлчилгээ” сэдэвт багц цагийн сургалт зохион байгууллаа.
Настанд үзүүлэх эрүүл мэндийн тусламж үйлчилгээг чанар хүртээмжтэй үзүүлэх зорилгоор Геронтологийн үндэсний төвөөс жил бүр ахмад настанд эрүүл мэндийн тусламж үйлчилгээ үзүүлдэг эмч, мэргэжилтнүүдэд зориулсан багц цагийн сургалтыг уламжлал болгон зохион байгуулж ирсэн.
Энэ жилийн сургалтыг “Ахмад настны цогц тусламж, үйлчилгээ” сэдвээр 2025 оны 3 дугаар сарын 27-ны өдөр эхлүүллээ. Уг сургалтыг Хавдар судлалын үндэсний төвийн зааланд зохион байгуулж, Нийслэлийн Баянзүрх, Баянгол, Сүхбаатар, Чингэлтэй, Хан-Уул зэрэг дүүргийн Өрхийн эрүүл мэндийн төвүүдийн 60 гаруй эмч, сувилагчид оролцлоо.
Сургалтыг Геронтологийн үндэсний төвийн дэд захирал М.Энхбаяр нээж хэлсэн үгэндээ 2024 оны 6 дугаар сард шинэчлэн батлагдсан “Ахмад настны тухай” хуульд Ахмад настны цогц тусламж үйлчилгээний талаар заалт орж, үүнийг ирэх 10 жилд хэрэгжүүлэх зорилт бидний өмнө тулгарч буйг онцлон тэмдэглэсэн.
Сургалтын үеэр ДЭМБ-ын “Настны эрүүл мэндийг дэмжих” 2021-2030 онд баримтлах бодлого, стратеги, чиг хандлага, Монгол улсын засгийн газраас 2025 оны 1-р сарын 1-нээс хэрэгжүүлэх Гэр бүл, хөдөлмөр нийгмийн хамгаалал, Эрүүл мэндийн сайдын хамтарсан “Ахмад настны асаргааны хувилбарт үйлчилгээ”, “Ахмад настны цогц тусламж үйлчилгээний журам” баримталж буй бодлогын баримт бичгүүдийг танилцуулав.
Дэлхийн эрүүл мэндийн байгууллагаас зөвлөмж болгосон “Настны цогц тусламж үйлчилгээний заавар”-ыг Монгол улсын онцлогт тохируулан боловсруулж Эрүүл мэндийн сайдын 2024 оны А/22 дугаар тушаалаар баталсан. Уг тушаалын дагуу ахмад настны Танин мэдэхүй, сэтгэц, хөдөлгөөн, хараа, сонсгол, хооллолт зэрэг үндсэн үйл чадавхыг хэрхэн үнэлж, нийгэм, сэтгэл зүйн зөвлөгөө өгөх арга зүйг танилцуулж, ахмад настны бодит тохиолдлыг шийдэхээр бүлгийн ажил хийв.
Энэхүү сургалтыг Нью Верамед эмийн компани ахмад настны хооллолт, үе мөчний үйл ажиллагааг биологийн идэвхт бүтээгдэхүүнээрээ дэмжин ажиллаа.
